By Maureen C. Minanago
Katika harakati za maisha ya kila siku, mara nyingi tunasahau kutazama na kuthamini uzuri wa mazingira yanayotuzunguka. Tunaishi kwa haraka, tukikimbizana na malengo, changamoto, na majukumu ya kila siku, kiasi kwamba hatupati muda wa kufurahia uzuri uliopo karibu nasi. Lakini ukweli ni kwamba, ulimwengu umejaa uzuri wa ajabu; tunachohitaji ni kubadilisha mtazamo wetu na kujifunza kuona thamani katika kila kitu.
Tujikite katika haya machache yafuatayo kufahamu zaidi uzuri huu katika uumbaji: uzuri wa asili uzuri katika watu na jamii, uzuri katika mambo madogo na kuishi kwa shukrani na mtazamo chanya.
Uzuri wa asili uzuri katika watu na jamii.
Mazingira ya asili yana nguvu ya kipekee ya kutuliza nafsi na kutupa amani ya ndani. Wakati mwingine, tunahitaji tu kusimama na kutazama jinsi jua linavyotua kwa utulivu, jinsi miti inavyotikiswa na upepo, au kusikiliza nyimbo za ndege wanaoimba asubuhi. Uzuri huu wa asili hutufundisha kuwa maisha yanapendeza, hata katikati ya changamoto.
Uzuri katika watu na jamii.
Uzuri haupo tu katika mazingira ya asili bali pia katika watu tunaokutana nao kila siku. Tabasamu la mtu mgeni, wema wa jirani, mshikamano katika jamii. Haya yote ni mambo yanayofanya maisha yawe yenye thamani. Tunapojifunza kuona uzuri katika watu wengine, tunajenga moyo wa shukrani na kuimarisha mahusiano bora.
Uzuri katika mambo madogo
Uzuri hauhitaji kuwa mkubwa au wa kushangaza ili kuthaminiwa. Unaweza kuuona katika vitu vidogo mfano: harufu ya mvua inapoanguka, chai moto unayoipenda, au kitabu kizuri kinachokupa maarifa mapya. Maisha yanakuwa mazuri tunapojifunza kufurahia na kushukuru kwa mambo madogo tunayoyapata kila siku.
Kuishi kwa shukrani na mtazamo chanya.
Kuona uzuri katika mazingira yanayotuzunguka kunahitaji mtazamo wa shukrani. Badala ya kulalamika kuhusu hali fulani, tunaweza kujifunza kuangalia upande mzuri wa mambo. Kila hali, hata zile zinazotufanya tuumie, zinaweza kuwa na somo la kutufundisha.
Kwa hivyo, badala ya kuishi kwa haraka bila kutambua uzuri uliopo, chukua muda wa kufurahia mazingira yako. Tafakari, thamini, na furahia kila kitu kizuri kinachokuzunguka; maana uzuri wa maisha uko katika namna tunavyochagua kuuona.
